മുലകുടി ബന്ധം സ്ഥാപിതമാകണമെങ്കില്‍ എത്ര കണ്ട് കുടിക്കണം, എപ്പോള്‍ കുടിക്കണം എങ്ങിനെ കുടിക്കണം?

നബി (സ) പറഞ്ഞു. ഒന്നോ രണ്ടോ ഈമ്പല്‍  കൊണ്ട്  വിവാഹ ബന്ധം നിഷിദ്ധമാകുകയില്ല. (മുസ്ലിം കിതാബുറ്‌റളാഅ്  നമ്പര്‍: 20) ആയിശ (റ) യില്‍ നിന്നുദ്ധരിക്കുന്നു. വ്യക്തമായ പത്ത് തവണ കുടിച്ചെങ്കിലാണ് ബന്ധം നിഷിദ്ധമാവുന്നത് എന്ന നിയമമാണ് ആദ്യമുണ്ടായിരുന്നത്. പിന്നീട് അഞ്ച് തവണ എന്ന നിയമം കൊണ്ടതിനെ ദുര്‍ബലപ്പെടുത്തുകയുണ്ടായി. അങ്ങിനെയിരിക്കെയാണ് നബി(സ) മരണപ്പെട്ട് പോയത് (മുസ്ലിം കിതാബുറ്‌റളാഅ്: 24 ഹദീസ് കാണുക). കുട്ടി മുലകുടി നിര്‍ത്തുന്ന കാലത്തിനുമുമ്പ്  സ്തനത്തിലൂടെ വയറ് നിറഞ്ഞ് സ്വയം പിന്മാറുന്ന നിലക്ക് കുടിക്കുന്നത് കൊണ്ടേ (വിവാഹ) ബന്ധം നിഷിദ്ധമാക്കപ്പെടുകയുള്ളൂ. (തുര്‍മുദി 5:458, ദാറഖുത്‌നി 4:173) രണ്ട് വയസ്സിനുള്ളില്‍ മുലകുടി ഉണ്ടായെങ്കിലേ മുലകുടി ബന്ധത്തിന് നിലനില്‍പ്പുള്ളൂ. (ദാറുഖുത്‌നി 4.174 മജ്മുഅ അബ്ദുല്‍ വഹാബ് ജില്‍ദ് 5) ചുരുക്കത്തില്‍ മുലകുടിക്കുന്ന പ്രായത്തില്‍ ചുരുങ്ങിയത് അഞ്ച് തവണ മതി വരുവോളം കുട്ടി മുലയില്‍ നിന്ന് പാല്‍ ഈമ്പി കുടിച്ചെങ്കില്‍ മാത്രമേ മുലകുടിബന്ധം സ്ഥാപിതമാവുന്നുള്ളൂ. എന്നാണ് ഇപ്പറഞ്ഞ തെളിവുകളില്‍ നിന്നെല്ലാം മനസ്സിലാവുന്നത്.