മുത്അത് വിവാഹം എന്നാലെന്താണ്? ഇസ്ലാം അതിന് അംഗീകാരം നല്‍കുന്നുണ്ടോ?

ദാമ്പത്യത്തിന് കാലപരിധി നിര്‍ണ്ണയിച്ച് നടത്തപ്പെടുന്ന വിവാഹത്തിന്നാണ് മുത്അത് വിവാഹം എന്ന് പറയുന്നത്. കാലം ദിവസമോ ആഴ്ചയോ മാസമോ വര്‍ഷമോ ആകാവുന്നതാണ്. ഇസ്ലാമിന്റെ ആദ്യകാലത്ത് ഈ രീതിയിലുള്ള വിവാഹം അനുവദനീയമായിരുന്നു. എന്നാല്‍ അത് പിന്നീട് ദുര്‍ബലപ്പെടുത്തപ്പെട്ടിട്ടുണ്ട്. സല്‍മത് ബ്‌നുല്‍അക്‌വഅ് (റ) വില്‍ നിന്ന്, നബി(സ) മുത്അത് വിവാഹം അനുവദനീയമാക്കിയിരുന്നു. പിന്നീടതിനെ നിഷിദ്ധമാക്കി. (ബുഖാരി 3:246, മുസ്‌ലിം നികാഹ്  നമ്പര്‍ 13 നസാഈ 6:103) അലിയ്യ് (റ) വില്‍ നിന്ന് – നബി (സ) മുതഅത് വിവാഹം വിരോധിച്ചു (ബുഖാരി-3:348). ഇബ്‌നു അബ്ബാസില്‍ നിന്ന് -ഇസ്ലാമിന്റെ ആദ്യകാലഘട്ടത്തില്‍ അനുവദനീയമായിരുന്നു മുത്അത്, പിന്നീട് സൂറത്തുന്നിസാഅ് 23-ാം വചനത്തിന്റെ വിശദീകരണമായ സൂറ: മുഅ്മിനൂന്‍ 6ാം വാക്യത്തില്‍ പരാമര്‍ശിക്കപ്പെട്ടതൊഴിച്ചുള്ള ഏത് സ്ത്രീയും നിഷിദ്ധമാക്കപ്പെട്ടിരിക്കുകയാണ് എന്ന് ത്വബറാനി, ബൈഹഖി എന്നിവര്‍ പറഞ്ഞതായി മജ്മഅ് സ്സവാഇദ് 3:264 ല്‍ കാണാം. ഇങ്ങിനെ കഠിനമായി വിരോധിക്കപ്പെട്ട ഇത് ഇനി ആരെങ്കിലും കൊണ്ടുവന്നാല്‍ അവന്‍ വേശ്യാവൃത്തിക്ക് വാതില്‍ തുറന്നവനായിരിക്കും (മജ്മൂഅ അബ്ദില്‍ വഹാബ്, 2:165). മദ്ഹബിന്റെ ഇമാമുമാര്‍ ഇത് ഹറാമാണെന്ന കാര്യത്തില്‍ ഐക്യപ്പെട്ടിട്ടുണ്ട്.