നാല് മാസം കഴിഞ്ഞാല്‍ അത് തനിയെ ത്വലാഖ് ആകുമോ?

ഇല്ല. ഇതുമായി ബന്ധപ്പെട്ട് പറഞ്ഞ ഖുര്‍ആന്‍ വചനം 2:226,227. അവര്‍ ശപഥത്തില്‍ നിന്ന് മടങ്ങുന്നുവെങ്കില്‍ അല്ലാഹു പൊറുത്ത് കൊടുക്കുന്നവനാണ് എന്ന് പറഞ്ഞ ശേഷം ഖുര്‍ആന്‍ പറഞ്ഞു: ഇനി അവര്‍ വിവാഹമോചനത്തിന് തീരുമാനിക്കുകയാണെങ്കില്‍ എന്ന്. ഈ പരാമര്‍ശം 4 മാസം ആയത് കൊണ്ട് അതു ത്വലാഖാകുകയില്ല, മറിച്ചു ത്വലാഖുകൊണ്ടു മാത്രമെ വിവാഹ മോചനം നടപ്പില്‍ വരികയുള്ളു എന്നു പഠിപ്പിക്കുന്നു. അത് തിരിച്ചെടുക്കാന്‍ അവകാശമുള്ള(റജഇയ്യായ) ത്വലാഖ് ആയിട്ടേ ഗണിക്കപ്പെടുകയുള്ളൂ എന്നാണ് ഭൂരിപക്ഷ അഭിപ്രായം ( നൈലുല്‍ അൗതാര്‍ 7:50, സുബുലുസ്സലാം 3:278). സംയോഗം ചെയ്യുകയില്ല എന്നതല്ലാത്ത ഏത് ശപഥവും ഈലാഇന്റെ പരിധിയില്‍ വരുന്നില്ല. ഇബ്‌നു അബ്ബാസില്‍ നിന്ന്- ജാഹിലിയ്യ കാലത്ത് ഈലാഅ് ഒരു കൊല്ലവും രണ്ട് കൊല്ലവുമൊക്കെയായിരുന്നു. അല്ലാഹു(ത) അതിനെ നാല് മാസത്തില്‍ ഒതുക്കി. നാല് മാസത്തില്‍ കുറഞ്ഞാലോ അത് ഈലാഅ് ആയിരിക്കില്ല (ബൈഹക്കീ സുബുലുസ്സലാം: 3:278) ഈലാഇല്‍ നിന്ന് മടങ്ങുന്നതാവട്ടെ അത് വാക്ക് കൊണ്ട് പോരെന്നും സംയോഗം കൊണ്ട് ആയിരിക്കണമെന്നും പണ്ഡിതന്മാര്‍ ഇതിന്റെ ചര്‍ച്ചയില്‍ വിശദീകരിച്ചിട്ടുണ്ട്.