ഇദ്ദ: ആചരണം സാധിക്കാതെ പോയാല്‍ എന്ത് ചെയ്യണം?

 ഇദ്ദ: ആചരണം സാധിക്കാതെ പോയാല്‍ അത് വിണ്ടെടുക്കേണ്ടതില്ല. ആചരിക്കാതിരുന്നതിന്റെ കാരണം അതിന്റെ മതവിധി അറിയാഞ്ഞതുകൊണ്ടും ഭര്‍ത്താവിന്റെ മരണം അറിയാഞ്ഞതുകൊണ്ടും ഇദ്ദ: സ്വയം തന്നെ വേണ്ടെന്ന് വെച്ചതു കൊണ്ടുമെല്ലാം ആകാവുന്നതാണ്.  കല്‍പ്പിച്ചുകൂട്ടി ഒഴിവാക്കിയതാണെങ്കില്‍ തൗബ നിര്‍ബന്ധമാണ്. ചോദിച്ചറിയാന്‍ സൗകര്യമുള്ളപ്പോള്‍ അറിവില്ലായ്മ പ്രതിബന്ധമല്ല എന്നാണ് ഭൂരിപക്ഷ പണ്ഡിതന്മാരും പറയുന്നത്. (ഇദ്ദത്തുല്‍ മുതവഫ്ഫാ സൗജുഹാ- സുഹ്‌റത് മുഹമ്മദുല്‍ ജാബിരി, പേജ്:30). ത്വലാഖ് ചൊല്ലപ്പെട്ടതും അല്ലെങ്കില്‍ ഭര്‍ത്താവ് മരണപ്പെട്ടതും വൈകിയറിഞ്ഞവള്‍ നഷ്ടപ്പെട്ട ദിവസം വിണ്ടെടുക്കേണ്ടതില്ല. ശേഷിക്കുന്ന ദിവസങ്ങളില്‍ ഇദ്ദ: ആചരിച്ചാല്‍ മതിയാകും. ചന്ദ്രമാസപ്രകാരമാണ് ഇദ്ദ കാലം കണക്കുകൂട്ടേണ്ടത്.
മരണമാണെങ്കിലും ത്വലാഖ് ചൊല്ലിയതാണെങ്കിലും അത് നടന്നതെപ്പോഴാണോ അപ്പോള്‍ തൊട്ടാണ് ഭാര്യ ഇദ്ദ: ആചരിച്ച് തുടങ്ങേണ്ടത് എന്ന് നബി(സ) പറഞ്ഞതായ റിപ്പോര്‍ട്ടുകള്‍ നിരവധിയുണ്ട് (അല്‍ ഉമ്മ്: 2:20). നിര്‍ബന്ധ സാഹചര്യങ്ങളിലല്ലാതെ ഇദ്ദ: കാലയളവില്‍ ഭര്‍ത്താവിന്റെ വീട്ടില്‍ നിന്ന് അവള്‍ മാറി നില്‍ക്കരുത്. ഫാത്തിമ ബിന്‍ത് ഖൈസിനോട് ഇബ്‌നു ഉമ്മി മഖ്തൂമിന്റെ വീട്ടില്‍ വെച്ച് ഇദ്ദ: ആചരിക്കാന്‍ നബി (സ) കല്‍പ്പിച്ചതിന്ന് കാരണം പറഞ്ഞത് അവര്‍ ബന്ധുക്കളോട് ചീത്ത സംസാരമായിരുന്നു സദാ നടത്തിയിരുന്നത് എന്നാണ് (അല്‍ ഉമ്മ് 2:222).