വിശുദ്ധ ഖുര്ആനില് ഇങ്ങിനെകാണാം:- അവന്റെ ഗര്ഭകാലവും അവന്റെ മുലകുടി മാറ്റി കൊണ്ടുള്ള വേര്പാടും (കുടി) മുപ്പത് മാസമായിരിക്കും. (ഖുര്ആന് 46:15). അവന്റെ മാതാവ് ക്ഷീണത്തിനുമേല് ക്ഷീണത്തോടെ അവനെ ഗര്ഭം ചുമന്നു. അവന്റെ മുലകുടി അവസാനിച്ചിട്ടുള്ള വേര്പാടാകട്ടെ രണ്ട് വര്ഷം കൊണ്ടുമാണ് (ഖുര്ആന് 31.14) മാതാക്കള് അവരുടെ സന്താനങ്ങള്ക്ക് പൂര്ണ്ണമായ രണ്ട് കൊല്ലം മുലകൊടുക്കണം. മുലകുടി കാലം പൂര്ത്തിയാക്കുവാന് ഉദ്ദേശിക്കുന്നവര്ക്കുള്ളതത്രേ (ഇത്) (ഖുര്ആന് 2:233)
അപ്പോള് ഗര്ഭകാലവും മുലകുടി നിര്ത്തിക്കൊണ്ടുള്ള കാലവും മുപ്പത് മാസമെന്ന് പറഞ്ഞു. അതില് നിന്ന് മുല കൊടുക്കണമെന്ന് പറഞ്ഞകാലം രണ്ട് വര്ഷം അഥവാ 24 മാസം കിഴിച്ചാല് ബാക്കി ലഭിക്കുന്നത് 6 മാസമാണല്ലോ, അതാണ് ഗര്ഭത്തിനുള്ള ചുരുങ്ങിയകാലമെന്ന് ആ ഖുര്ആന് വചനങ്ങളില് നിന്ന് മനസ്സിലാക്കാം. വിവാഹാനന്തരം ആറ് മാസം കഴിഞ്ഞ് ഉടനെ പ്രസവിച്ച ഒരു സ്ത്രീയുടെ പേരില് , ആ കുട്ടി തന്റേതല്ലെന്ന് അവളുടെ ഭര്ത്താവ് ഉസ്മാന്(റ) വിന്റെ അടുക്കല് വാദിക്കുകയുണ്ടായി. ഉസ്മാന്(റ) ആദ്യം ആ വാദം ശരിവെക്കുകയും ചെയ്തു. എങ്കിലും ആ ആയത്തിന്റെ (മുപ്പത് മാസം) അടിസ്ഥാനത്തില് അലി(റ) ചൂണ്ടിക്കാട്ടിയതനുസരിച്ച് അദ്ദേഹം പിന്നീട് ആദ്യ വിധി മാറ്റുകയും ഗര്ഭകാലം ആറ് മാസം മാത്രം ആവാനിടയുണ്ടെന്നും കുട്ടി ഭര്ത്താവിന്റേത് തന്നെയാണെന്നും തീരുമാനിക്കുകയും ചെയ്തു. (ഇബ്നു ഇസ്ഹാഖ്, അമാനി മൗലവി പരിഭാഷ 3019).