ആയിശ(റ) യില് നിന്ന് – അബുസുഫിയാന്റെ ഭാര്യ ഹിന്ദ് ബിന്ത് ഉത്ബത് നബി (സ) യെ സമീപിച്ച് പറഞ്ഞു: നബിയേ, അബുസുഫ്യാന് വല്ലാത്ത പിശുക്കനാണ്. അയാള് എനിക്കും എന്റെ മക്കള്ക്കും ചിലവിന് തരുന്നില്ല. അയാളറിയാതെ ഞാനെന്തെങ്കിലും എടുത്തെങ്കിലല്ലാതെ, അങ്ങിനെയാകുമ്പോള് എനിക്കതിന്ന് കുറ്റമുണ്ടാകുമോ? നബി(സ) പറഞ്ഞു: നിനക്കും നിന്റെ മക്കള്ക്കും ആവശ്യമായത്ര അയാളുടെ സ്വത്തില്നിന്നും നിനക്കെടുക്കാവുന്നതാണ് (ബുഖാരി നികാഹ് നമ്പര് 5364, മുസ്ലിം 3:1338)
ഭക്ഷണം, വസ്ത്രം, പാര്പ്പിടം, ചികിത്സ എന്നിവ കഴിവുള്ളവര് കഴിവനുസരിച്ചും അല്ലാത്തവര് അതനുസരിച്ചും (ഖുര്:65:7) നല്കുകയെന്നല്ലാതെ ചിലവിന്റെ കൃത്യമായൊരു അളവ് പറയുക സാധ്യമല്ല. കോടതിയോ മറ്റോ നിര്ണ്ണയിച്ചു കഴിഞ്ഞാല് അതാണ് നിര്ബന്ധമാകുക. മൂന്നാം തവണയും ത്വലാഖ് ചൊല്ലപ്പെട്ടവള് ഗര്ഭിണിയല്ലെങ്കില് അവള്ക്ക് താമസസൗകര്യം കൊടുക്കണമെന്നും ഗര്ഭിണിയാണെങ്കില് ചിലവും താമസ സൗകര്യവും കൊടുക്കേണ്ടതാണെന്നും മാലിക്, ശാഫിഈ (റ) പറഞ്ഞിട്ടുണ്ട്.